GARUT SELATAN DIAPILAINKEUN?

Pamarentah Kabupaten Garut nu ayeuna bisa wae masih keneh anyar, tapi kailaharan nu kakara nyepeng hiji kalungguhan tangtuna oge miboga sumanget nu masih keneh ngagedur.
Timana atuh ngamimitian ngawangun Garut teh ?
Salah sahijina nyaeta mitembeyan ngaropea sarana jalan nu ngahubungkeun kota Garut jeung wewengkon Pakidulan Garut... Cenah ceuk sawatara jalma nu pirajeunan ngawangkong jeung kuring, yen wewengkon pakidulan Garut teh miboga aset nu pohara mundelna.
Coba ayeuna papay ti mimiti perkebunan enteh di Neglasari kecamatan Cisompet anu kacida upluk-aplakna jeung sumber daya alam nu euyeub komo mun dimekarkeun deui tempat wisatana mah anu sakitu endahna. Katambah perkebunan kakao ( coklat ) nu bisa leuwih digali deui jeung dironjatkeun deui hasil produksina.
Ayeuna asup ka wilayah kecamatan pameungpeuk. Didinya aya lahan pertanian nu kacida legana, nu salila ieu bisa nyubadanan kabutuhan pangan warga Pameungpeuk khususna, oge warga Garut dina umumna. Salain sektor pertanian, Pameungpeuk oge miboga sumber daya alam nu sejenna. Diantarana sumber daya pariwisata pantai, nyaeta Objek Wisata Sayang Heulang nu aya di desa Mancagahar, jeung rea-rea deui tempat nu aya di wilayah kecamatan Pameungpeuk. Di Kecamatan Cibalong jeung Miramareu aya perkebunan karet jeung sumber daya laut oge hutan lindung" leuweung sancang ". Di Kecamatan Cikelet aya perkebunan kelapa sawit jeung wisata pantai Santolo, Gunung Geder, Taman Manalusu jeung nu lain-lainna.......

Oge rea deui sumber daya alam nu dipiboga ku wilayah Garut Selatan. Naha pamarentah kabupaten Garut teu ngarasa lebar mun eta sumber daya alam nu sakitu mundelna mun seug teu digali ? Prak atuh geura ropea deui ku pamarentah sangkan taraf hirup masyarakat pakidulan Garut bisa ngaronjat jeung nu akhirna mah bisa ngaronjatkeun PAD pikeun Kabupaten Garut.